佇今年五月十二日，中國四川汶川遭受傷亡誠大的地動了後，我一直有收著對中國寄來，關係這遍地動主題的詩。我原底有想欲佇這期的詩刊內底，做一个專輯刊登。毋閣，佇讀完遮的詩了後，我原本嚴肅的心，煞予遮的詩沖薄去，也感受著詩人的虛幻心態的可怕。其中，一首為死難者點燭光祈求、安魂的詩內底，作者寫講「你不孤單，你有神州」。另外，毋是寫黨中央書記佮共和國總理的身影，著是詩內底祖國祖國一直喝[hoah]。猶有人共地動造成的廢墟，比喻做春天的廢墟，提來佮當佇中國本土傳送的奧運聖火相比，表明廢墟內面的黑暗和死亡，會因為祖國傳聖火的堅強，得著春天的溫暖佮母親的關懷。

      當慶典佮人民死傷慘重的苦難仝時發生的時陣，我佇一寡中國詩人的詩內底讀著的毋是感動，是詩人予慶典的歡喜佔滿的心，讀著的是可怕的心態，是無法度燒痛人心的虛幻的火舌。這也使我想起前幾日奧運期間，新疆主張獨立的份子所做的暴動死傷事件，佮西方人士佇天安門為西藏自由所做的發聲。

      佇中國遐爾大的土地上，佇外圍的土地，資訊無便利的所在，屠殺一直咧進行，佇較內圍的所在，著是藉用法律定罪，銃殺異議份子。虛胖的大，是中國一直堅持的，佇烏暗中，這个虛胖的國家藉用的是包裝和平的武力去恐嚇異族。