自從你出世彼刻
我就包你紅幼軟柔的規身軀
捌你的鼻目嘴
捌你的耳
捌你的臉
時時認捌一切
你的心隨
五官染洗
日夜心思浮動全身的氣味
我鼻著
日日清楚一切
世俗安怎裝扮
你的跤手舉止
身體漸漸卡肥敢無予你變較寬容？
頷頸愈硬敢無予你更加堅持？
被擲捨
換新無數擺的我
即算每工透早攏清洗妥協的臉
逐日敢有真正醒起來過？
洗清過一生
歷積全身的污油垢
破敗的宿命證明
一切真實的過程
終其尾被擲捨
究竟是因為本質腐壞
恐驚洩漏予世間人發見
硬弓活咧的內部
像一條舊破的面巾！
文章分類 : [ 台灣語現代詩
]
文章分類 : [ 台灣語現代詩
]
枯葉知毋知影
誰踏過？
誰收集？
佇每片枯葉頂寫落詩句
匟入摸彩箱中
有人摸出 「暮色足像黎明的天光」
有人摸出 「就算有一百個教授佇這國土也袂會有魏爾倫的雨落來」
有人摸出 「衫仔呈顯本體袜掩崁本體」
有人摸出 「入場券票根記袂住上演的劇情」
有人摸出 「叛逆是前衛的母親虛偽佮順從是雙生仔」
有人摸出 「青草陪伴枯葉回想」
有人摸出 「黃昏的球拍漏接飛懸的鳥」
有人摸出 「剪斷枝枒放捨的靈魂」
有人摸出 「囝仔耍球推動無心的星辰」
………………
所有的人摸出的
詩句攏無相關
無仝詩人的心
枯葉捌佇樹頂青過
隨意排列這些詩句
會構成怎樣的世界？
誰收集？
誰踏過？
枯葉知毋知影？
文章分類 : [ 台灣語現代詩
]
你想講已經甲我抝斷
實際上
我是變做兩塊雙倍
力量對雙頭湠向四方
你想講已經甲我打死
實際上
我是匿佇生的眼神中
隨時準備閣再出世
你想講已經甲我碾灰
實際上
我是化做空氣
佇你每一个喘氣中
你想講已經甲我埋葬
實際上
我發規土跤的野草
纏綴你行踏的跤步
文章分類 : [ 台灣語現代詩
]
無罪的手掌
予兇惡的鐵線貫規串
規群跪佇岸壁邊
集體槍殺後
像一條染血的金珮鍊
跋落深冷的海底
誰會當閣找轉來？
回收是一種反省
毋反省會當回收嗎？
政治犯是白色恐怖時代的畚圾？
台灣一群人予當做畚圾擲捨的歷史
咱有徹底反省無？
真正有回收嗎？
虔敬對待畚圾
才會當提煉黃金
咱的胸崁有外濟真純的黃金
家己知影重量嗎？
咱攏一直活佇鍍金的虛假中？
文章分類 : [ 台灣語現代詩
]
講欲大和解的咖啡
無細字倒置白色的桌巾頂
咖啡的痕跡
槍孔鑽出澹濕的血跡
堅乾佇白SHIRT的胸崁前
時代無記智的
桌巾收去洗清氣了後
閣重鋪平繼續啉大和解的咖啡白SHIRT起斑變黃
袂赴老的青年翁婿
穿過被槍決的歷史
無落水洗清的一工
我青春的紅花
永遠乾死佇咖啡色血跡的胸崁前
文章分類 : [ 台灣語現代詩
]
佇去看你的路上
雨滴飄落日光中
有甜蜜溫暖照射過來
有苦澀冰冷刺痛面肉
佇去看你的路上
雨滴飄落日光中
落佇草頂，滴佇額角
白髮的愛漸漸生佇少年的頭頂
綠草湠開忘情的大地
佇去看你的路上
想著選擇無名姓的愛情
無人理解的堅持，隨時
夯頭像毋顧生命的戰士佇去看你的路上
世界的愛恨猶原糾葛難分
九官鳥咬世間人的舌
足像雷峰塔的法海嫉妒白娘娘
許仙穿薄釐絲的春衫
薄到像無名姓的愛情
佇去看你的路上
火熏佇平野漸漸昇起
閣予強風雄雄吹散
愛情原來是隱藏溫柔的殘忍
糖甘密甜化盡
生命的鋼釘，釘入婚姻的樑柱
久年親密的攬抱
鋼質已經磨損，樑柱也蛀穿
往日竟然變成甜蜜的鉀酸
變做兩人溫柔的意外陷阱
佇去看你的路上
廟寺的鐘鼓聲聲響起
靜心的梵唱句句入耳
愛情的酒甕填滿骨灰
相會或者告別已經無啥悲喜
佇去看你的路上
無一絲反悔
孤獨是毋是有另外的思考
佇真情袂當表白
真話袂當講出的時代
面對孤獨敢有可能幸福？
佇去看你的路上
雄雄感覺袂使閣去看你
畢竟你猶原是世間的男女
顧守互相佔有的私情
而且一切痛苦攏對佔有開始
佇去看你的路上
雨滴飄落日光中
日光歸日光，雨滴歸雨滴
互相無佔有的愛情閣開始分明
相愛袂閣相阻礙
無阻礙無佔有著無相爭
無爭無私重見真性情
佇去看你的路上
山水已經美麗真久
著算這時閣見著你
會當感動對你講的
祇剩這份自然的性情
文章分類 : [ 台灣語現代詩
]
日頭跤的大埕
母親扶持細漢查某囡仔
來回咧學車
母親耐性精曯講
「免驚免驚
雙手扶好」
細漢查某囡仔親像聽無咧嘻笑
母親
恬恬放手收回慣勢的扶持
細漢查某囡仔
干若有偎靠勇敢向前騎
等幼稚的面擱再斡頭看無
母親已經消失佇空曠的大埕
大埕
空曠
細漢查某囡仔
佇腳踏車上
咧嚎
文章分類 : [ 台灣語現代詩
]
一切相爭
攏是為遮開始
因為大家攏講家己是
唯一的門路
文章分類 : [ 台灣語現代詩
]
世間浮浮沉沉
其實即是逐日咧
爬樓梯
落樓梯
文章分類 : [ 台灣語現代詩
]
天地無仁慈
是無目睭的
人類硬用自己的青盲
當作天地的聰明
文章分類 : [ 台灣語現代詩
]
阿立祖換青了後
規瞑攏落袂停的雨
雨滴聲叮叮咚咚
落響佇咱查某祖的腹肚頂
雨聲咁是尫姨咧牽曲
咱規陣攏叫袂醒
是因為也袂出世
或則在世是另外一種死亡
繼續眠夢是另外一種清醒
也是托爾斯泰講被叫醒即是自殺
咱規陣攏佇生活中
慢慢自殺
歷史的清醒
是要留予死亡來讀嘛？
文章分類 : [ 台灣語現代詩
]
眠夢中時常佮真實倒反
如果是做惡夢
彼是因為真實世界尚幸福
恐驚失去幸福
如果是做美夢
往往因為真實生活太殘酷
希望遠離殘酷
夢是行佇走索頂的平衡篙
失去篙仔的穩定前程高險
欲安怎穩當通過
生命真濟困擾的斷崖
夢是珍貴的密碼
欲啟示世間人把握真實
愛的三頓每日攏煮好
這是真實
時時等你來作伙食
這是美夢
愛的眠床逐瞑攏鋪好
等你來相偎入眠
這是美夢
經常孤單枕頭的眠床
確是真實
真實佮夢
你的人生到底愛對一種？
文章分類 : [ 台灣語現代詩
]
選舉前伊親像外國人
佇台灣莊腳四界LONG STAY！
選舉時伊聲聲句句攏講
伊是台灣人！
憨直的台灣人
也是將選票投予
過去極力反對總統直接民選的
伊當選新總統
台灣郵便麥發行
紀念新總統就任的郵票
伊續講這毋是「中華郵政」
拒絕「台灣郵便」
伊是台灣人！
講甲嘴角全沫
LONG STAY！
攏是假！
LONG STAY！
攏是假！
伊真老實講一點仔攏無騙
您台灣人！
文章分類 : [ 台灣語現代詩
]
逐日攏聽講這該死彼該死
污染該死
黑心該死
欺騙該死
貪污該死
出賣該死
…………
事實上這攏袂死
逐日攏聽講這愛予伊活落去
環保愛活
良心愛活
誠信愛活
清廉愛活
公義愛活
…………
事實上這攏袂活
該死袂死
該活袂活
袂死袂活
到底是啥物世界？
文章分類 : [ 台灣語現代詩
]
瞑時坐佇記憶的海邊
少年時代的岸
佇海港對面
彼陣燈光無茲爾五花十色
是黑白電視轉播
美國太空人登陸月球的時代
色彩燦爛
是人人珍貴的期望
親像即陣兩台遊艇
「真愛號」「光榮號」
歸船攏攀滿彩色電火泡仔
海波浮沉
反射千萬粒鑽石的光影
毋過有外濟現代虛情的假意
要坐即隻「真愛號」去遊夜港
每日有外濟遭遇現實的屈辱
要坐即隻「光榮號」去吹海風
港的眠夢
船浪的顯影
自由理想確實真遠
現實的岸無介遠真緊就到
「光榮號」將歸群
受殘酷生活屈辱的人
送上岸
「真愛號」將歸群
受虛情折磨假意的人
送上岸
岸邊企的看板
用大粒心包小粒心
心會轉的看板
彩色燈火框起來
紅色心
禁電後
續反黑
引擎關掉後
即陣真愛佮光榮
攏睏佇緘靜的岸壁
一隻黑狗趴佇
海岸邊
看守幽深的暗瞑