台灣民族是由真濟受歷史屈辱的種族結合所形成，多族群多語系的台灣民族，承擔歷史累世壓迫的苦難，面對這塊島嶼歷代予裂解掩崁的主體，久長屈服佇外來統治者的語言，咱一直予逼去使用殖民者的語言來思考、寫作，對荷蘭時代的新港文書開始、經過清國的滿州官話、日本的和語、到現此時中國的北京話為止，咱的平埔語已經消失，山地各民族語也強欲滅亡，客語福佬話嘛將近斷種。   

          今仔日台灣多數人講的台灣話，煞予少數人講的北京話壓制，台灣話至今[kàu-taⁿ] ，事實上是語言的弱勢者，所以選擇用台灣話來思考寫作，除了母語深厚的感情因素，上重要是一个台灣作家的歷史使命感予伊倚佇同情弱勢這爿，這即是珍貴的左派精神，堅持即是上好的抵抗！   

          台灣久長的歷史屈辱，毋是用雅化的北京語講會出伊的苦楚耶，干單用台灣話的音調纔有法度哭出聲耶！咱真久哭袂出聲，我對台灣話的書寫找著紅嬰仔佇父母攬抱中的哭聲！一爿寫一爿感覺欲嚎，若像聽著台灣民族久長遠古的哭聲！   

          今年八月中高雄市文化局舉辦「好讀書系列活動」，展示對日據台灣到中國統治時代歷來的「台灣教科用書國民讀本」、「國語課本」，同時邀請一批北京語作品，予編選入去教科書內的台灣中文作家出席座談，講這叫做「台灣作家的榮耀」，我無收著邀請函，一个無意中的外人，行入去會場，親像無意中看著叼工安排的一本一本台灣民族「語言的屈辱」史！   

          受屈辱是民族的擔頭，受壓迫是民族的力量，台灣話是台灣拋荒真久的原野，咱逐日辛苦犁，攏毋捌做主有收成過，咱的鹿群攏予人剝皮剝到絕種，咱的台灣話敢欲放予斷氣？親像咱的平埔母祖仝款？咱意志的種子，隨時播種佇原野，等歷史天理的雨水滋潤，佇世界公義的日頭跤，凡勢有一工會當生湠民族尊嚴的景致。   

          一九八九年夏天開始創作第一首台語詩，然後無真堅持寫台語，到五十六歲才來出版這本台灣語詩集「泅是咱的活海」，實在延遲真久，延遲找著這條台灣的生路，感覺過去浪費真濟時間佇北京語，無啥彩工！為著欲補償這款的遺憾，我將會創作一生第一首一千二百行的台灣語長詩，來向台灣這塊「累世之靶」賠罪！ 

                                                                 2008.8.16 高雄港都