選舉前伊親像外國人

佇台灣莊腳四界LONG STAY！

選舉時伊聲聲句句攏講

伊是台灣人！

憨直的台灣人

也是將選票投予

過去極力反對總統直接民選的

伊當選新總統

台灣郵便麥發行

紀念新總統就任的郵票

伊續講這毋是「中華郵政」

拒絕「台灣郵便」

伊是台灣人！

講甲嘴角全沫

LONG STAY！

攏是假！

LONG STAY！

攏是假！

伊真老實講一點仔攏無騙

您台灣人！

逐日攏聽講這該死彼該死

污染該死

黑心該死

欺騙該死

貪污該死

出賣該死

…………

事實上這攏袂死

逐日攏聽講這愛予伊活落去

環保愛活

良心愛活

誠信愛活

清廉愛活

公義愛活

…………

事實上這攏袂活

該死袂死

該活袂活

袂死袂活

到底是啥物世界？

少年時代的岸

佇海港對面

彼陣燈光無茲爾五花十色

是黑白電視轉播

美國太空人登陸月球的時代

色彩燦爛

是人人珍貴的期望

親像即陣兩台遊艇

「真愛號」「光榮號」

歸船攏攀滿彩色電火泡仔

海波浮沉

反射千萬粒鑽石的光影

毋過有外濟現代虛情的假意

要坐即隻「真愛號」去遊夜港

每日有外濟遭遇現實的屈辱

要坐即隻「光榮號」去吹海風

港的眠夢

船浪的顯影

自由理想確實真遠

現實的岸無介遠真緊就到

「光榮號」將歸群

受殘酷生活屈辱的人

送上岸

「真愛號」將歸群

受虛情折磨假意的人

送上岸

岸邊企的看板

用大粒心包小粒心

心會轉的看板

彩色燈火框起來

紅色心

禁電後

續反黑

引擎關掉後

即陣真愛佮光榮

攏睏佇緘靜的岸壁

一隻黑狗趴佇

海岸邊

看守幽深的暗瞑

國史館的檔案室

冷氣冷到親像殯儀館

冷凍死人的冷凍櫃

光到反黑的走廊

正邊檔案室典藏

   「蔣總統史料」

左邊檔案室典藏

   「二二八事件田野調查資料」

受難者歸群擠一間

加害者一個人佔一間

攏緘緘倒佇冷凍櫃

對相的歷史

走廊黑暗

點日光燈的假光

當做日頭光

下班後的國史館

烏暗中

受難者冤魂攏來追問：

「這是甚物歷史？

    找無身世！」

加害者鬼影現身討講：

   「這是那一國？

        我的國家在哪？」（浙江腔北京語）

老鼠佮咬紙永遠

繼續佇歷史烏暗的走廊

趖來趖去

歷史蹚踏過的山頭有幾粒

有幾粒人頭予挫落來

落入深山溝內

沒人知影

歷史浮佇海面

有偌濟血淚的鹹度

溶佇波浪內底

沒人知影

歷史的瓜藤

委屈四界旋的冤魂

種籽失去身世

沒人知影

歷史的船開出去

找無港口偎岸

咱的嘴舌講袂出過去

沒人知影

歷史的島嶼無人知影伊的名

親像梅花鹿大家攏欲掠

親像海翁大家攏欲刣

大家攏相爭欲號名

但是大家攏毋知家己叫甚麼名？

攏予人凌遲的歷史

島嶼吞忍的龍骨

累積年久月深

化石的怨恨

毋知未來毋知佇當時

要翻身大地動

魚尾反一擺

島嶼即愈泅愈遠

海翁的運命

即是大小尾繼續泅

繼續泅咱的活海

這千萬毋通毋知影

對面店仔隨時

燃一座油滾的火鼎

啥人欲予掠去

擲入去鼎內煎做死魚